जिब जुनारफोरनि सोमोन्दै

जिब जुनारफोरनि सोमोनदै

सरासनस्रायै जिउ गोनां आरो जायगा जाबसेनिफ्राय गुबुन दाबसे जायगासिम दोरोदनो एबा दावबायनो हाग्रा मिथिंगानि थादेरसाखौनो जिब होननानै बुंनाय जायो। जिबनाव देरनाय, लावनाय, जौगानाय आरो दोरोदनो मिथिंगायारि हानाय गुन आरो आखुथाय थायो। बुहुमाव सानथ्रहायै फोलेरनि जिब मोननो हायो। दासिम जिब बिगियानगिरिफोरा 1.71 सो निजुत जिब फोलेरखौ सिनायनो हानाय जादों । मानसिनिफ्राय लानाै नुनो मोनसयै दोबोद फिसा फिसा जिबफोरा बुहुमनि गुबुन जायगायाव गोसारनानै दं।

बुहुमनि गासै जिबफोरखौ नोजोर होयोबा गासैबो जिबनिनो महर, गुन आरो आखुथायफोरखौ गुबुन गुबुन नुनो मोनो आरो बेफोरबादिनि थाखाय मानसिया जिबफोरखौ गोख्रै सिनायनो हानायनि थाखाय मुंफोरखौ दोनदोंमोन। आथिखालाव बेफोर मुंखौ लानानै माबादि जिबा मा रोखोमै थांनानै दं, बिसोर मा खामानि मावो, माबोरै जायो, माबोरै जोलै फेहेरो आरो सोरनि थाखाय खहा आरो बानजायनाय होयो बेनि सायाव फरायसंनाय जादों।

गाहायाव माखासे जिबफोरनि मुं होनाय जाबाय आरो बिसोरनि सुंद' सिनायथिजों लोगोसे बानजायनायखौबो होनो नाजानाय जाबाय।

मोसौ- मोसौआ नआव फिसिजानाय जुनार। गाहायै आबादारिफोरा आबाद मावनायाव मदद मोननायनि थाखाय बे जुनारखौ फिसिनाय जायो। मोसौ दामब्रा आरो हालुवाजों हाल एवो बेनि अनगायैबो गारि बोयो। मोसौ गायखौ गायखेर मोननायनि थाखाय फियो । फारसेथिं मोसौ गायआ जाबाय जोलै फेहेरनायाव गाहाय फाव लायो। मानसिया मोसौ गायखौ बेनिखायनो फियो आरो रां आरजिनाय बादियाव मदद मोननायनि थाखाय जोथोन लायो। गोबां हादोरावनो मोसौ बेदर जायो आरो बेदरनि थाखायनो फिनायखौ नुनो मोनो।

बोरमा- बोरमाया नआव फिसिजानाय जुनार। बेदरनि थाखाय बोरमाखौ फिनाय जायो। फालांगिनि थांखियै गोबां जायगायावनो बोरमाखौ फियो। रांखान्थि आरजिनायाव थारैनो बोरमाया हाजासे मदद होयो।

गराय- नआव फिसिजानाय जिब। गोदोनि समाव गरायनि बाहायजानाया बांसिनमोन जाय समाव गारि मथरनि बाहायनाया गैयाखौनो बुंजायोमोन। गरायाव गाखोनानै दावहारु जोहोलावफोरा दावहा नाङोमोन, जोबोद गोजान गोजान लामाखौबो हानथियोमोन, बेबादिनो बायदि रोखोमनि मुवा बेसाद रोगानो थाखाय गराय गारि सालायोमोन।

एमफौ एनलाफोरनि सोमोनदै

जोंनि सोरगिदिं थानाय मिथिंगायाव गोबां रोखोमनि एम्फौ-एनलाफोरखौ जों मेगनजों नुनो मोनो। खायसे एमफौफोरखौ जों गोरलैयै मेगनजों नुनायावबो गोब्राब जायो। जोंनि आबहावानि गुदिमुवा हिसाबै गोसारलानानै थानाय एम्फौफोरा गोबां महर आरो आखुथाइनि जायो। गोबां एम्फौफोरा मानबायो आरो गोबांआनो बिरबायो (बिरबायग्रा एम्फौखौ गांफौ होननानैबो बुङो)। बिसोरनि थानाय, जानाय आरो आयुफोरा गुबुन गुबुन जायो। गोबां एम्फौफोरानो गांसो जायो, गोबां एम्फौफोरा बेदर जायो आरो माखासे एम्फौफोरा हा जानानैनो थायो। हा सिङाव, बिफांनि दालाइ आरो बबेबा बिफांनि सिङाव आरो बबेबा जिबनि देहानि सिङाव थानायानो जिबफोरनि गुबुन गुबुन थांनानै थानायनि खुलि। माखासे एम्फौफोरखौ मानसिया आदार महरै जायो।

मा मा एम्फौफोरा हा सिङाव थायो नोंसोर मिथिगौदा?जों मेगनजों नुनो मोननायफोरनि मादाव खुसेंग्रा, खानस्रि, सेलेमाला बेफोरबादि जिबिफोरा हा सिङाव थायो।

माबादि एम्फौफोरा दंफां सिङाव थायो मिथिगौदा? गुनजेर, दामब्रिमाला आरो माखासे हारिनि बेरेफोरा दंफां आरो हानि गुदुं सिङाव हाबनानै थायो।

माखासे एमफौफोर दं जायखौ मानसिया आदार महरैबो बाहायो। बांसिनै हागरा आरो गामियाव थाग्रा गोग्लैसोनाय हारिनि मानसिफोरानो एमफौफोरखौ आदार महरै जायो। बर'फोराबो बेबादि मोनसे हारि जाय माखासे एमफौफोरखौ आदार हिसाबै जायो। माबादि एम्फौफोरखौ बर'फोरा आदार महरै जायो मिथिगौदा?

खुसेंग्रा, गुमा गोथाव, गुमा नारें, गुमा संग्रा, इन्दि एम्फौ, मुगालाथा, सिंखावरि आरो गांजेमा बेफोरबादि एम्फौफोरखौ बर'फोरा आदार महरै जायो। बिसोरनि थाखाय बेफोर मिलौलायनाय आरो मोदोमफ्रु खाजा जायफोरखौ बांसिनै बाथोन देनानै जानो मोजां मोनो।

खायसे एमफौफोरा गांसो आरो गुबुन जिबनि सायाव सोनारनानै थांनानै थानायनि सोलाय हा जानानै थांनानै थानायखौसो नुनो मोनो। मा एम्फौआ हा जानानै थायो मिथिगौदा? बुंनो थाङोबा उजिनायनि माखासे उननिफ्रायनो खानस्रिया हा जानानैसो थांनानै थायो। खानस्रिया आबादारिफोरनि थाखाय मोजां बानजायग्रा। बेयो आबादारिफोरनि आबादथिलियाव हासार जगायनानै होयो जायनि थाखाय बेखौ आबादारिनि लोगो होननानैबो बुंनाय जायो।

माखासे एमफौआ मानसिनो मोजां बानजायनाय होयो। मानसिनो आदार बुथुमनायनि मदद होनायनि लोगोसे रांखानथि आरजिनायावबो थोजासे बिबान लायो। इन्दि एमफौ आरो मुगा एम्फौनि फिथोबनिफ्राइ सि दिहुननो हायो?

माखासे एमफौफोरा मानसिनि गोबां खहा खालामो।ओरैबादि खायसे एमफौफोर दंदि बेबादि एम्फौआ मानसिनि आबादखौ जोबोद गाज्रियै खहाबो खालामो। बेबादि आबादखौ खहा खालामग्रा एमफौफोरनि मादाव दं आवमा आरो गुमा गयं। बेफोरबादि एम्फौरा आबादखौ इनायनो खहा खालामो।

माखासे एमफौफोरनि सोलो आरो गुनखौ बाखोनायाबा थानो हाया। खायसे एम्फौआ जे सोंनानै मैहुर खालामो आरो बिसोरनि मादाव माख्रा आरो बेमाखौ रायखांनो गोनां जायो। बिसोरो गावसोरनि जेखौ गले गले सिफायजाबाबो फिन गले गले सोंफिनबाय थायो।

माखासे ओरैबादि एम्फौफोर दंदि बिसोर गुबुन जिब-जिबिनि थै सोबो आरो थांनानै थायो। लेवार, बेदलाव, उराव आरो गोबां हारिनि थाम्फैफोरा गुबुन जिबिनि थै सोबो।

खायसे एम्फौआ गोसो होनानै बासा बोयो आरो बिदै बानायो बेफोरनि मादाव बेरेया रायखांजाथाव। बेरेनि बिदैखौ जानानै मानसि आरो खायसे जिबिया जोबोद गोजोननाय मोनो। बेरेमोदैया माखासे गुजुनाय बेमार आजारखौबो फाहांनो हागौ।

माखासे एम्फौफोरखौ बर'फोरा जिउ खुंनायाव मदद मोननायनि थाखाय नआव फिसियो। इन्दि एम्फौआ बेवहाय रायखांजायो।

सोंथि 01. बयनिख्रुइबो लासैसिन हानथिग्रा जिबिया मा?

(क) खासेव

(ख) गोलेर

(ग) मोसौ

(घ) बोरमा

सोंथि 02. मा जिबिनि आयुआ बयनिख्रुइबो खमसिन (खालि सानसेल' थांनानै थायो)?

(क) मैसो

(ख) गानदा

(ग) जाहामालाय

(घ) मेफ्लाइ

सोंथि 03. मा जुनादआ गासै जिबिफोरनि मादाव गोजौसिन?

(क) मैदेर

(ख) सिंह

(ग) जिराप

(घ) मुफुर

सोंथि 04. मा जुनादनि गङा खानायजों दाजानाय?

(क) लख्रा

(ख) सियाल

(ग) गान्दा

(घ) सेसा

सोंथि 05. बयनिख्रुइबो गेदेरसिन आरो गोलावसिन जिबौनि मुङा मा?

(क) जिबौ गोरान

(ख) आनाकण्डा

(ग) फिथिगम

(घ) दारास

सोंथि 06. बोरियाव थाग्रा बयनिख्रुइबो देरसिन जुनादनि मुङा मा?

(क) सिंह

(ख) मैदेर

(ग) गानदा

(घ) मुफुर

सोंथि 07. बयनिख्रुइबो गोख्रैसिन खारनो हाग्रा जिबिनि मुङा मा?

(क) अमा

(ख) सेसा

(ग) मोसा

(घ) मैदेर

सोंथि 08. बयनिख्रुइबो सोलो गोरोंसिन जिउनांनि मुङा मा (मानसिनि उनाव)?

-डलफिन ना

सोंथि 09 बुहुमनि गेदेरसिनथार जिबिनि मुङा मा?

-ना तिमि

सोंथि 10 मा जुनादनि बिगुरा बयनिख्रुइबो गोरासिन?

-गान्दा

सोंथि 11 मा मा जुनादफोरा थैजासिम खेबसेबो दै लोङा?

-केंगारु आरो एनजर

सोंथि 12 मा जिबौनि बिसआ बयनिख्रुइबो गिलुबासिन?

-केउट

सोंथि 13 बाइसन मुंनि जुनादखौ बबे बबे हादरमानि सिङाव मोननाय जायो?

-सा आमेरिका आरो इउरप

सोंथि 14 मा जिबियाल' खालि राव रायज्लायनो गोरों?

-मानसि

सोंथि 15 मानसिनि बिगियानारि मुङा मा?

-हम' स्पेयेन्स

सोंथि 16 थनै गं गोनै गान्दाखौ बबेहाय मोननाय जायो?

-आफ्रिका

सोंथि 17 थसेल' गं गोनां गान्दाखौ बबेहाय मोननाय जायो?

-आसाम

सोंथि 18 मा जिबिया गावनि लिरथाइनिख्रुइबो बांसिन (नैजि फान) बजाय दिखांनो हायो?

-मोस्रोम

सोंथि 19 बुहुमाव मा जिबिनि अनजिमाया बयनिख्रुइबो बांसिन?

-मोस्रोम

सोंथि 20 मा जिबिया मालायखौ अरै अरै थैलाङो?

-खैजिमा