दासिम फद्मश्री बान्था मोननो हानाय बर' सुबुंफोर

फद्मश्री बान्थाया भारत सोरखारनि ब्रैथि देरसिन बान्था। बे बान्थाखौ 1954 मायथाइनि 2 जानुवारी खालारखालि फसंदोंमोन। भारतनि सोरखारा बोसोरफ्रोमबो बे बान्थाखौ हादोर आरो सुबुं समाजनि थाखाय आरिमु, सोलोंथाइ, दारिमिन, थुनलाइ, बिगियान, फाव खालामनाय, मुलि, समाज सिबिनाय आरो सुबुं अनसायनाय बायदि फोथाराव गेदेरथार बिहोमा होनायनि थाखाय हादोरनि सुबुं खुंथाइ साननि सानसे सिगां फोसावना होयो। बे बान्थाखौ हादोरगिरिया भारतनि सुबुं खुंथाइ सानखालि गावनि आखायजों गथायनानै होयो।

दासिम बर' सुबुंफोरनि गेजेराव फद्मश्री बान्था मोननो हानाय गेदेमा सुबुंफोरा साबा जाबाय । गाहायाव बिथांमोननि फारिलाइजों लोगोसे सुंद' सिनायथि होनाय जादों।

1.मदाराम ब्रह्म: 1988 मायथाइयाव बिथाङा फद्मश्री बान्थाखौ मोननो हादोंमोन। राव आरो थुनलाइनि थाखाय गेदेर बिहोमा होनायनि थाखाय बिथाङा बे बान्थाखौ मोननो हादोंमोन।

2.ड० कामेस्वर ब्रह्म: 2016 मायथाइयाव बिथाङा बे बान्थाखौ मोननो हादोंमोन। बिथाङा सासे सोलोंथाइगिरि, थुनलाइगिरि आरो हारि दैदेनगिरि। बर' थुनलाइ आफादनि बिथाङा मोनसे समाव आफादगिरि जादोंमोन। राव सोलायनायनि थाखाय बिथाङा 2020 मायथाइयाव भारत सोरखारनि साहित्य अकाडेमि बान्थाखौबो मोननो हादोंमोन।

3.ड० मंगलसिं हाज'वारि: 2021 मायथाइयाव बिथाङा राव आरो थुनलाइनि थाखाय गेदेर बिहोमा होनायनि बे बाथ्राखौ मोननो हादोंमोन।

4.सर्बेस्वर बसुमतारी: 2024 मायथाइयाव बिथाङा बे बान्थाखौ आबाद मावनायाव गावखौ नांथाबनाय आरो सुबुं समाजाव आदार जगायनायनि थाखाय बे बान्थाखौ मोननो हादोंमोन। बिथाङा बिजनि हालामनि सासे बयजोंबो मिथिजानाय जाफुंसार आबादारि।

5.ड० अनिल कुमार बर': 2025 मायथाइनि थाखाय बिथाङा बे बान्थाखौ सोलोंथाइ आरो थुनलाइनि थाखाय गेदेर बिहोमा होनायनि थाखाय मोननो हायो। बिथाङा सासे सोलोंथाइगिरि, लिरगिरि आरो खन्थाइगिरि। गावनि 'देल्पिनि अन्थाइ मोदाय आरो गुबुन गुबुन खन्थाइ ' मुंनि खन्थाइ बिजाबनि थाखाय बिथाङा भारत सोरखारनि साहित्य अकाडेमि बान्थाखौ मोननो हादोंमोन। आथिखालाव बिथाङा गौहाटी मुलुगसोलोंसालिनि सुबुं हारिमु बिफाननि बिफानारि गाहाइ ।