हाजो आरो हाजो गाखोग्राफोरनि सोमोन्दै

हाजो आरो हाजो गाखोग्राफोरनि सोमोन्दै

(About the mountains and mountaineers)

लैथो बिखुंनिफ्राय 7,200 मिटार गोजौ आरो बेनिबो बांसिन जौथाइनि मुलुगाव गं 108 सो हाजोफोरखौ मोननो हायो। बांसिन बेबादि जौथाइनि हाजोफोर एचिया आरो इउरपआव मोनो। गाहायै एचियानि नेपाल, चिन, भारत आरो पाकिस्तानआव बेफोरबादि गोजौ थिखिनि हाजोफोरखौ मोननो हायो।

माउनट एभारेष्टआनो जादों मुलुगनि जौसिन हाजो थिखिनि। गाहायै बेयो चिन आरो नेपाल मोननै हादोरनि गेजेराव दं। भारतनि सासे मुंदांखा सानखान्थिगिरि राधानाथ सेकर बिथाङा गिबिसिनै माउन्ट एभारेष्टनि थिखिनिनि जौथाइखौ 1852 मायथाइयावनो सानखान्थिनि गेजेरजों दिहुनदोंमोन। बेनि जौथाया जादों गासै 8,848.86 मिटार। इंराज बुहुमखौरांगिरि सार जर्ज एभारेष्टआ संजेननायखाय बिथांनि मुङैनो माउन्ट एभारेष्टनि मुङाबो जादोंमोन होननानै माखासे बुहुमखौरांगिरिफोरा फोरमायदों। माउन्ट एभारेष्ट हाजोआ मानसिफोरनि गोसोखौ जेब्लाबो थिखिनि फारसे बोहरो जायनि थाखाय मुलुगनि गोबां मानसिफोरानो बेनि थिखिनिसिम गाखोनो गोसो जानायखौ फोरमायो। बेबादिनो गोसो बोथाबजानानै बे हाजोखौ गिबियाव नेपाल हादोरनि टेनजिं नरगे आरो निउजिलेण्डनि एडमान्ट हिलारी बिथांमोनहा 1953 मायथाइनि 29 मे खालारावनो गाखोजेननो हादोंमोन। भारतनि आइजो बासेन्द्रि फाल बिथाङा बिखौ 1984 मायथाइयाव गाखोदोंमोन आरो मुलुगनि गिबिसिन आइजो माउन्ट एभारेष्ट हाजो गाखोग्रा होननानै मिथिजादोंमोन। भारत सोरखारा बिथांनो 2019 मायथाइयाव भारतनि थामथि देरसिन बान्था Padma Bhushan खौ होदोंमोन।

काराकरम हाजोमालारिया एचिया हादोरमानिनो सिङाव थानाय कासमिराव दं। फाकिस्तान, चिन आरो भारतनि गेजेराव बेयो दं। आपगानिस्तान आरो ताजिकिस्तान हादोरफोराबो बे हाजोमा लारिनिनो सेराव। काराकरम हाजोमालारिनि सेथि आरो मुलुगनि नैथि जौसिन हाजो थिखिनिया जादों के2 (बेनि आबुं मुङा जादों The King of Mountains)। बेयो गिलजिर आरो बालिस्टाननि गेजेराव दं। बेनि जौथाइया जादों लैथो बिखुंनिफ्राय 8,611 मिटार। बे हाजोखौ बुथारग्रा हाजो थामहिनबा Savage mountain होननानैबो मिथिनाय जायो। मानोना बेवहाय बोसोरफ्रोमबो हाजो गाखोग्रा मानसिफोरखौ सासे नङा सासे बुथारो। थांनाय 31 जुलाइ 1954 मायथाइयाव बेखौ इटाली हादोरनि आचिली कमकेननि आरो लिन लाचेदेल्ली बिखांमोनहा गाखोजेनदोंमोन। मुंदांखा मिथिंगा बिगियानगिरि गडउइन अस्टिननि मुङैबो बे हाजोआ मिथिजायो।

कानचनजंगाया जादों हिमालय हाजोआव थानाय मुलुगनि थामथि जौसिन हाजो। बेनि जौथाया जादों 8,586 मिटार। बेयो भारत आरो नेपाल मोननै हादोरनि गेजेराव दं।

लटसेआ जादों मुलुगनि ब्रैथि जौसिन हाजो थिखिनि। बेनि जौथाइया लैथो बिखुंनिफ्राय 8,516 मिटार। बेयो तिब्बेत, चिन आरो नेपालनि गेजेराव दं। 18 मे 1956 मायथाइयाव बेखौ सुइसनि प्रिटस लुसिंगार आरो इरनेस्ट रिइस बिथांमोनहा गाखोजेनदोंमोन।

माकालुआ मुलुगनि बाथि जौसिन हाजो थिखिनि। बेनि महरा फिरामिट महरनि। बेनि जौथाइया लैथो बिखुंनिफ्राय 8,485 मिटार। बेयो नेपाल आरो चिननि गेजेराव दं। 15 मे 1955 मायथाइयाव बे हाजोखौ फरासिनि लिय'नेल टेरे आरो जिन फाउजि बिथांमोनहा गाखोजेनदोंमोन।

चयु अयु बेयो मुलुगनि दथि जौसिन हाजो थिखिनि। बेनि जौथाइया लैथो बिखुंनिफ्राय 8,188 मिटार। चिन आरो नेपालनि गेजेराव बेयो दं। 19 अक्टबर 1954 मायथाइयाव अस्ट्रलियानि सेप्प जचलार आरो पासां दावाजों गाखोजेनदोंमोन।

धौलागिरिया जादों मुलुगनि स्निथि जौसिन हाजो थिखिनि। बेनि जौथाइया लैथो बिखुंनिफ्राय गासै 8,167 मिटार। बेयो नेपालआव दं।  थांनाय 13 मे 1960 मायथाइयाव अस्ट्रलियानि कुरटि दिमबारजार, ए स्टेलबार, इ परार, नावां दर्जि आरो निमा दर्जि बिथांमोनहा बे हाजोखौ गाखोजेनदोंमोन।

मानास्लुआ जादों मुलुगनि दाइनथि जौसिन हाजो थिखिनि। बेनि जौथाइया जादों लैथो बिखुंनिफ्राय। बेयो नेपाल हादोरनि सिङाव दं। 8,163 मिटार। 9 मे 1956 मायथाइयाव बे हाजोखौ जापान हादोरनि मोनसे हाजो गाखोग्रा हानजाया गाखोजेनजेनमोन।

नंग पर्बतआ जादों मुलुगनि गुथि जौसिन हाजो थिखिनि। हिन्दीनि नंग सोदोबनि ओंथिया जाबाय लंथं, बेखायनो बेखौ लंथं हाजो होननानैबो मिथिनाय जायो।  बेनि जौथाइया लैथो बिखुंनिफ्राय गासै 8,126 मिटार। गाहायै बे हाजोआ फाकिस्तानआव दं। 3 जुलाइ 1953 मायथाइयाव बे हाजोखौ अस्ट्रलियानि हेरमेन बुहुल होननाय हाजो गाखोग्रा बिथाङा गाखोजेनदोंमोन।

अन्नपुरन', बेयो मुलुगनि जिथि जौसिन हाजो थिखिनि। बेनि जौथाइया लैथो बिखुंनिफ्राय गासै 8,091 मिटार। गाहायै बे हाजोआ नेपालआव दं। थांनाय 3 जुन 1950 फरासिनि मावरिच हेरजग आरो लुइस लाचेनेल बिथांमोनहा गाखोजेनदोंमोन।