बैसागु फोरबो- बैसागुखौनो बैसागो होननानैबो बुङो। बे फोरबोखौ बैसाग दानआव फालियो । इंराजि दाननि एफ्रिल दानआव गोग्लैयो। बैसागुआ बर'फोरनि माइ आबाद मावनायजों गोथौ सोमोन्दो गोनां फोरबो। बैसागु रंजानाय जोबनाय लोगो लोगो गाय फुनायनि बोथोर सफैयो। बैसागु मेथाइयाव माइ गायनाय फुनायनि बाथ्राया रोखायै बेरखाङो। गोदोनि समाव दान मोनसे फालियोमोन होननानै बुङो। आथिखालाव स्नि सान फालिनायखौ बांसिन नयदायगायाव नुनो मोननाय जायो।
मागो फोरबो- मागोखौनो दमासि होननानैबो बुङो। बर'फोरनि आबाद दिखांनायजों गोथौ सोमोन्दो दं। माग दानआव फालिनाय फोरबोखायनो बेखौ मागो होननानै बुङो। बे फोरबोआव फिथा, सिथाव, सौराय, एनथाब, लारु बायदिसिना एवनानै जानायखौ नुनो मोनो। हारसाफोरा बेखौनो माग बिहु होननानै बुङो।
आमथिसुवा- दैज्लां बोथोरनि मोनसे फिथाइ सामथाय जानाय सान। बे समाव जोंनि सोरगिदिं मिथिंगाया दैजों बुंफबजोबो। गायनाय फुनाय बहर। दुब्लिया दै लोमनानै गुरै जाबोयो। बैसोमुथिया गोरबोआव थायो होनानै बर'फोरा फोथायो। सासे आइजोआ जेब्ला गोरबोआव फिसा थायो होनबा गोखै फिथाइजों लोगोसे बायदिसिना फिथाइ सामथाय जानो लुबैसोगारो। बेखायनो आमथिसुवानि सानआव बर'फोरा खानथाल आरो थाइजौ फिथाइफोरखौ जायो। बे सानखालि रावबो आबादारिफोरानो हाल एवा।
खाथि फोरबो - खाथि फोरबोखौनो खाथि बैसागु एबा माइनाव फोरबो होननानैबो बुङो। बे फोरबोआ अक्टबर दाननि गेजेराव जायो। बे समाव माइ ओंखारफुनाय सम। गोबां एमफौ एनलाफोरा बिबारखौ नोसथो खालामना होयो। खाथि फोरबोनि मोनसे जुनिया सान दं जाय सानखालि मोनाबिलि समाव बर'फोरा माइबारियाव जेवारि फोजोंना दोनहैयो। गोबाङानो जेवारि बाथि हिसाबै थाइगिर बिखंखौनो बाहायो।
दै सान्थि सारनाय- बेखौनो दै सारनाय होननानैबो बुङो। मानसि जोनोम जानाय समाव नखरनि बयबो सुबुुङानो रंजानाय मोनो। गोजोननायजों गावखौनो बुंसहायै रंजानायखौ लाखियो। सासे गथआ जेब्ला जोनोम हायो बिनि उथुमायखौ हास'नायनि मोनसे सम आरो सानखौ थि खालामनांगौ जायो। बेबादिनो माखासे समाव उथुमाय हानायनि बाराय थि खालामनानै उथुमाय हासनायखौ लानाय जायो। बै सानखालि फालिनाय सानखौनो दै सान्ति सारनाय होननानै बुंनाय जायो।
हालजांख्रा- आबादजों गोथौ सोमोन्दो गोनां मोनसे दुब्लियावनो फालिनाय फोरबो। बे फोरबोआव दाहोना, रुवाथि आरो बयबो रंजा-बाजा आरो होख्राव-होस्रि खालामनानै गावजोंगाव हाब्रु सारफावना जायो।
0 Comments