माखासे मुलि बिफां आरो लाइफां

माखासे मुलि बिफां आरो लाइफां

(Some medicinal plants) 

सिजौ (Sijou- Euphoria tree) : बेयो बर' हारिनि हारिमु आरो दोहोरोमजों गोथौ सोमोनदो गोनां मोनसे लाइफां। बे बिफांनि दालाइयाव सु दं। बिलाइया गुरै आरो नायनो मोजां । बेनि सिरिया सिरिबा। बर'फोरनि बाथौ दोहोरोमारि मानसिफोरा बेखौ गावसोरनि सिथ्लायाव गायनानै लायो आरो गावसोरनि समबादि बेनि गुदियाव बाथौ दुमनानै फुंबिलि आरो मोनाबिलि समाव आलारि बाथो फोजोंनानै खुलुमो।

बर'फोरा गोदो गोदायनिफ्रायनो सिजौ बिलाइ आरो बिफांखौ मुलि हिसाबै बाहायबोदों। सिजौ बिलाइखौ खानानै अराव हाङोबा एबा सावोबा दै ओंखारो आरो बेजों खावलायफोराव गालथाव जादोंबा नानानै लायोबा हामो। सिजौ बिफांनि दालाइखौ दानसनानै आसि गोथां जानायाव आसथाम गाननायबादि सोनानै लायोबा हामो।

सिजौ बिफांआव सु थानायलाय मोसौ आरो बोरफा बायदि जुनारफोरा साफिनो हाया। बेखायनो बर' गामिनि मानसिफोरा सिगांनि समाव ननि सेर सेर गायना लायोमोन जाथाथे रावनिबो मोसौ मैसो फालोआ हाबफैनो हाया।

थुलुनसि (Tulunshi) : फिसा फिसा मिहि मिहि रोखोमसे फिसा हारिनि लाइफां। बेहा जुनिया मोदोमनाय गुन दं। गुजुनाय आरो गगा मोननाय जायोबा बेखौ सिफ्लेनानै बेरेमोदैजों सोमनानै लोङोबा गुजुनाया जोबोद थाबैनो हामो। मोदोमाव माननाय एबा दादुफोर जायोबा संख्रिजों सिफ्लेनानै नायोबा दादुवा हामो होननानै गोबाङानो फोरमायो। थुलुनसिया गाहायै माननाय बेरामखौ फाहामनाय एबा होखारनायनि थाखाय मोजांथार जानायलाय बेजों माखासे मोदोमाव फुनग्रा थाव आरो दुगैग्रा साबोनबो खालामनाय जायो।

अरखाम (Orkham) : बेयो गुरै आरो उन्दै हारिनि मोनसे रोखोमनि लाइफां। गुबुन रावै बेखौ फात गाजा होननानैबो बुङो। बिलाइयावनो गाजा सुयो आरो बेबादिनो बिफां जायो थारै बेबादिनो एरो। आखाय आरो आथिङाव सिखाफोर बौवोबा बेनि बिलाइजों जोबोद गोरलैयैनो फाहामनो हायो।

बोरमा दारि (Bwrma dari) : रोखोमसे मोदोमफ्रु मोदोमनाय गोनां उन्दै हारिनि लाइफां। गुफुर गाबनि बिबार बारो आरो बिबार बारोबा नायनो इनायनो समायना नुयो। आखाय एबा आथिं आरो जायखिजाया मोदोमनि अंगआवनो बौनानै थै गयोबा बेजों सिफ्लेनानै फुननानै लायोबा थाबैनो थै गनाया बन्द' जायो। 

बिलाइ गोजा (Bilai gwja) : गुबैयै बेनि मा मुंखौ बर'आव मा होनो रोखायै मिथिनो मोननाय जायाखै। बेयो मोनसे रोखोमनि मुलि लाइफां। बिलाइखौ सिफ्लेयोबा बिदैया थै गाबनि नुनो मोनो। जेब्ला मोदोमाव सिखा एबा रुवा बौनानै थै ओंखारो होनबा बेखौ सिफ्लेनानै फुननांगौ। जोबोद थाबैनो थै गनाया बन्द' जायो।

Last edited on 4th October 2022