बर'फोरनि हालेवनायाव बाहायग्रा आगजुफोर

बर'फोरनि हालेवनायाव बाहायग्रा आगजुफोर

(Material things use in ploughing) 

बर'फोरखौ आबादारि हारि होननानै बुंनाय जायो। बिसोर नोगोर सहरनि सोलाय गामियावसो बांसिनै थानो मोजां मोनो। जेराव दावराव-दावसि गैया, जेराव मानसिनि बिहिर आरो होंगो-दोंगो गैया बेबादि सिरि गोगो सुदेम बार मोननाय, गोरलैयै मैगं मैला खानानै एबा बुथुमनानै मोननाय, माइ- माइरं ओंखामनि आंखाल गैयै, दैसा गाथोन एबा थौलेयावनो दैखर खुरनानै मोननाय दै , ना आरो बेदरनि आंखाल गैयै जायगायाव बर'फोरा गावसोरनि गामिखौ फसंनो नाजायो। सरासनस्रायै बर'फोरा हाग्राबारि आरो दैमा दैमासि सेर सेर थानो मोजां मोनोखाय बेवहायनो गामिखौ फसंनानै लाखिदों। गाहायै बर' मानसिफोरनि जिउ खुंनाय राहाया जादों आबादनि सायाव सोनारनाय। आबाद मावनायनि अनगायैबो बर'फोरा दंफां दाननाय, खामला हाजिरा मावनाय, ना हमनाय आरो मैहुर खालामनानै जायो।

आबाद मावनो थाखाय गोबां आयजें आयला आरो आगजुफोर नांगौ जायो। बेनिनो हालेवनायाव नांगौ जानाय आगजुफोरा मोनसे आबाद मावनायाव गोनां जानाय आगजुफोर। बर'फोरा नांगोलजों हालेवनानै आबाद मावो आरो बुथुमो। बेबादिनो आरोबाव हाल एवनाय समाव नांगौ जानाय गोबां आगजुफोर दंबावो बेखौनो गाहायाव मोनसे फारिलाइ आरो बेफोरनि सुंद' बुंफोरलु होनाय जादों।

नांगोल (plough) : बर'फोरा नांगोलखौ दंफांजोंनो बानायनानै लायो। हालेवनायाव गोनांसिन आगजु होनोबा नांगोलनि मुङानो गोसोआव फैग्रोयो। नांगोलनि गुबै खामानिया जादों हाखौ एवखुनाय । गंसे नांगोल जानो थाखाय बेहा हाखौ एवखुनो थाखाय गोफार मोनसे फाल थानांगोन बेखौ बर'फोरा लहा एबा सोरखौ बानायो जायखौ नांगोल फाल होननानै बुंनाय जायो। नांगोलाव आखाय हमनो थाखाय हमग्रा मोनसे मुथि थानांगोन , बेखौ नांगोल मुथि होननानै बुंनाय जायो। नांगोलनि बिजौ बाहागोखौ गोरायै लाखिनो थाखाय खिला दोथाबनानै लाखिनांगौ जायो, बेखौ नांगोल खिला होननानै बुंनाय जायो। बेबादिनो जुंगाल जुरिनो थाखाय बिजौआव हांख्ला हांख्ला दाननानै लानांगौ।

जुंगाल : हालेवनायाव गोनांथार मोनसे आगजुआ जादों जुंगाल। नांगोलल' थानानै जुंगाल गैयाबा जेबो खामानियानो जानानै फैया। जुंगालाव मानै मोसौखौ जुरिनाय जायो। मोसौखौ बेवहाय फारनैजोंबो मासे मासे जुरियो। जुंगालखौ औवाजों बानायनाय जायो।

लावथि (stick) : हालेवनाय समाव लावथिया जोबोरैनो गोनांथार। लावथिजों बुयै बुयैसो मोसौखौ जोबोद मोजाङै सिखायनो हायो। लावथियानो हालेवनाय समाव सामलायग्रा मोनसे हाथियार। लावथि गैयाब्ला मोसौआ गोसोबादि थाबायलाबायनो हागौ आरो खामानिखौ जाफुंसार होनायनि सोलायै गाज्रिसो खालामनो हागौ। हालेवनाय समाव बाहायग्रा मोसौ लावथिखौ लोरौ होननानै बुंनाय जायो।

दिरुं: हालेवनाय समाव दिरुंआ जोबोरैनो गोनांथार। जुंगालाव मोसौखौ हमथानानै लाखिग्रायानो दिरुं। बेनि अनगायैबो मैखौ दिरुंजोंनो खानाय जायो।

मै : हालेवनाय समाव बाहायग्रा मोनसे आगजुआ जादों मै। हालेवनायाव हाथर , हाब्रु आरो गोबां जाबोर सिखारबोयो। गोबां गोजौ गाहाय जायो। बेखौ स्लिम खालामनो थाखायनो मैखौ बाहायनाय जायो। मैयाव गाखोनानै मोसौखौ बोहोयोब्ला थारैनो हालेवनायाव जानाय गोजौ गाहायफोरा समान जाफिनो। बेखौनो मै होनाय होननानैबो बुंनाय जायो।

हासिनि : गोरान हायाव हालेवनाय जायोब्ला गोबां हाग्रा एबा जाबोर सिखारो। बैफोर जाबोरफोरा आबाद फोनायाव गोबां उसुबिदा खालामो। बेखायनो आबादारिफोरा बैफोर जाबोरखौ हायथुमनानै गारनो एबा सावगारनो थाखाय मोनसे आगजु बाहायो बेनो जादों हासिनि।